ანჩისხატის ტაძართან შეიქმნა გალობის შესწავლით დაინტერესებულ ბავშვთა ჯგუფი. მოსწავლეებს მეცადინეობები უტარდებათ საქართველოს საპატრიარქოს სასწავლო-კვლევითი ცენტრის მიერ დამტკიცებული პროექტის ფარგლებში, რომლის ხელმძღვანელია მალხაზ ერქვანიძე. პროექტი ხორციელდება 2017-2018 სასწავლო  წლიდან. ჯგუფი აერთიანებს 10-15 წლის ბიჭებსა და გოგონებს. მოზარდებისთვის შექმნილი სასწავლო პროგრამა ითვალისწინებს სხვადასხვა სამუსიკო დისციპლინების სწავლებას. ესენია: ტრადიციული საეკლესიო გალობა (მასწავლებელი – მალხაზ ერქვანიძე), ქართული ხალხური სიმღერა (მასწავლებელი – დავით აბრამიშვილი), სამუსიკო ანბანი და მუსიკის თეორიის საფუძვლები (მასწავლებელი – ქეთევან მათიაშვილი). მიმდინარე სასწავლო წელს ბავშვები პირველად მიიღებენ  მონაწილეობას აღდგომის ბრწყინვალე დღესასწაულის  ღვთისმსახურებაში.