2016-2017 წლებში ალავერდის ეპარქიის წმიდა ბიძინა, შალვა და ელიზბარის სახელობის სკოლის ფოლკლორული ანსამბლი „ახალნერგი“ მონაწილეობდა საქართველოს საპატრიარქოს საეკლესიო გალობის სასწავლო-კვლევითი ცენტრის პროექტში „ბავშვთა მგალობელთა გუნდის ჩამოყალიბება“ (პროექტის ხელმძღვანელი: ნატალია ივანიშვილი). პროექტი მიზნად ისახავდა ქართული საეკლესიო გალობის ცოდნის დანერგვა-გავრცელებას ბავშვთა გუნდებში.

ანსამბლი „ახალნერგი“ ჩამოყალიბდა ამბა ალავერდელი მიტროპოლიტი დავითის ლოცვა-კურთხევით (2013 წ.). მოსწავლეები თავდაპირველად საქართველოს სხვადასხვა კუთხის ხალხურ სიმღერებს სწავლობდნენ. ზემოხსენებული პროექტის ფარგლებში მათ გელათის სკოლისა და ქართლ-კახური სადა კილოს წირვის წესის საგალობლებიც შეისწავლეს. საგალობლები ბავშვებს შეასწავლა წმიდა ბიძინა, შალვა და ელიზბარის სახელობის სკოლის მუსიკის მასწავლებელმა, თბილისის ბიჭვინთის ყოვლადწმინდა ღვთისმშობლის ხატის სახელობის ტაძრის მგალობელმა, ნატალია ივანიშვილმა.